सरकारमा बसेर काम गर्न नसके बाहिरिन्छौँ : गृहमन्त्री लामिछाने

13

काठमाडौँ, ३० जेठ । गृहमन्त्री एवम् राष्ट्रिय स्वतन्त्र पार्टी (रास्वपा)का सभापति रवि लामिछानेले आफू र दलका मन्त्रीहरुले तीन महिना सरकारमा बसेर कुनै पनि नराम्रो काम नगरेको ठोकुवा गर्नुभएको छ ।

उहाँले सरकारमा आफ्नो दल काम गर्नकै लागि गएको उल्लेख गर्दै काम गर्न सक्ने वातावरण नबने सरकारमा बसिरहनु पर्ने आवश्यकता नरहेको बताउनुभयो ।

बुधबार काठमाडौँमा नेपाल समाजवादी पार्टी (नेसपा)को स्थापना दिवस कार्यक्रममा सभापति लामिछानेले भन्नुभयो, ‘यो तीन महिना सरकारमा बसेर हामीले के राम्रो गर्‍यौँ मलाई थाहा छैन । तर, केही पनि नराम्रो गर्नु भनेको सबैभन्दा राम्रो गर्नु हो । देशमा । म छाती ठोकेर भन्न सक्छु तीन महिना सरकारमा बसेर मेरो दलका मन्त्रीहरुले एउटा पनि नराम्रो काम गरेका छैनन् । कति राम्रो काम गरिन्छ त्यो हेर्दै जाने कुरा हुन् ।’

डा.बाबुराम भट्टराईको राजनीतिक हुटहुटीको सम्मान गर्न कार्यक्रममा सहभागी भएको बताएका लामिछानेले आफ्नो समयमा डा.भट्टराईले आफ्नो पद र जिम्मेवारीमा सकेजति काम गर्ने व्यक्तिको उदारहण भएको बताउनुभयो ।

वितगमा माओवादीले व्यवस्था बदल्न गरेको परिवर्तनको नेतृत्व गर्दा भट्टराई र प्रचण्डको नियत के थियो भन्ने नजाने पनि उनीहरु दुईको एक आदेशमा देशका लागि ज्यानको बली दिने योद्धाको सम्मानका लागि पनि व्यवस्थालाई बलियो बनाउन लागेको चर्चा लामिछानेले गर्नुभयो ।

यस्तै, लामिछानेले सँगै मञ्चमा बसेका जनमतका अध्यक्ष सिके राउतले निर्वाचन प्रणाली परिवर्तन गरेर प्रत्यक्ष निर्वाचित कार्यकारी प्रधानमन्त्री बनाउने आन्दोलनको लागि तयार हुन रविलाई गरेको आग्रहप्रति जवाफ दिँदै भन्नुभयो, ‘मलाई आन्दोलनबाट परिवर्तन गर्ने कुरामा असहमत हुनुपर्ने कुरामा केही छैन । तर, नागरिकलाई दुःख दिने कुरामा म सहमत छैन । अब जनताले दुःख पाउने होइन, नेताले दुःख पाउनुपर्‍यो । नागरिकलाई दुःख नदिइ हामीले गर्नुपर्ने परिवर्तनका लागि तयार छौँ ।’

उहाँले प्रदेश नेताहरुलाई तह लगाएर राख्ने पार्किङस्थल जस्तो भएको उल्लेख गर्दै त्यसमा सुधार गर्दै जानुपर्नेमा जोड दिनुभयो ।

उहाँले व्यवस्थाभित्र तागत भएको तर इमान्दारिपूर्वक काम गर्ने दलको प्रतिबद्धतालाई भुल्न नहुने धारणा राख्नुभयो । लामिछानेले काम गर्न सक्दासम्म सरकारमा बस्ने र नसक्दा निस्कने प्रष्ट पार्नुभयो ।

उहाँले भन्नुभयो, ‘सकेको काम गर्नकै लागि हामी सरकारमा सहभागी छौँ । नसक्दा या अनावश्यक कसैको भारी बोक्न पर्‍यो भने त्यहाँ बसिरहनु पर्ने केही आवश्यकता छैन ।’

Share This:
सम्बन्धित खबर
Loading...