टी–२० विश्वकप : अष्ट्रेलियाले ओमानलाई ३९ रनले हरायो
काठमाडौँ, २४ जेठ । आइसिसी टी–२० विश्वकप क्रिकेटमा अष्ट्रेलियाले विजयी सुरुवात गरेको छ । ब्रिजटाउनमा बिहीबार भएको खेलमा अष्ट्रेलियाले एसोसिएट राष्ट्र ओमानलाई ३९ रनले पराजित गरेको हो ।
अष्ट्रेलियाले दिएको १६५ रनको लक्ष्य पछ्याएको ओमानले निर्धारित ओभरमा ९ विकेट गुमाएर १२५ रन बनायो ।
ओमानका आयान खानले ३६ रनको पारी खेले । उनले ३० बलमा दुई छक्का र दुई चौका प्रहार गरेका थिए ।यसैगरी कप्तान अकिब इलियासले १८ बलमा १८ रनको पारि खेल्दा एक छक्का र दुई चौका हिर्काए । मेहनर खानले १६ बलमा २७ रन बनाए । उनले २ छक्का र १ चौका प्रहार गरे । साकिल अहमेदले ११ रन बनाउँदा कलिमुल्लाहले ६ रन जोडे । ओपनर कश्यप प्रजापति ७ रनमा आउट हुँदा खलिद काली ८ रनमा पभेलियन फर्किए ।
अष्ट्रेलियाका एडम जाम्पाले ४ ओभरमा २४ रन खर्चिएर २ विकेट लिए । मिचेल स्टार्कले ३ ओभरमा २० रन खर्चिएर २ विकेट लिँदा मार्कस स्टोइनिसले २ ओभरमा ७ रन दिएर २ विकेट हात पारे । नाथन इलियसले ४ ओभरमा २९ रन खर्चिएर २ विकेट लिए ।
टस हारेर पहिला ब्याटिङ गरेको अष्ट्रेलियाले निर्धारित ओभरमा ५ विकेट गुमाएर १६४ रन को योगफल बनाएको थियो । अष्ट्रेलियाका मार्कस स्टोइनिसले ६६ रनको नटआउट अर्धशतकीय पारी खेले । उनले ३५ बलमा ६ छक्का र २ चौका प्रहार गरेका थिए । यसैगरी डेभिड वार्नरले पनि ५१ बलमा ५६ रनको अर्धशतकीय योगदान दिए । उनले १ छक्का र ६ चौका प्रहार गरेका थिए । ट्राभिस हेडले १२ रन बनाउँदा कप्तान मिचेल मार्सले १३ रन बनाए । ग्लेन म्याक्सवेल गोल्डेन डकआउट हुँदा टिम डेभिडको ब्याटबाट ६ रन आएको थियो ।
ओमानका मेहरन खानले २ विकेट लिँदा विलाल खान, कलिमुल्लाहले १–१ विकेट हात पारे ।