सरकारले विपक्षलाई पेल्न खोजे कांग्रेस चुप लागेर बस्दैन : सिटौला
काठमाडौँ, १३ जेठ । नेपाली कांग्रेसका नेता कृष्णप्रसाद सिटौलाले सरकारले संसद्मा कांग्रेसले उठाएको सहकारीको एजेण्डामा पेलेर जान खोजे कांग्रेस सहेर नबस्ने चेतावनी दिनुभएको छ ।
गणतन्त्र दिवसको अवसरमा काठमाडौँमा आयोजित कार्यक्रममा नेता सिटौलाले सरकारको पेलेर जान चाहने प्रवृतिको विरोध गर्नुभयो ।
उहाँले कांग्रेस आफ्नो मागमा नडगमगाउने भन्दै सरकारले प्रतिपक्षको आवाज नसुने जस्तोसुकै चुनौतीको सामना गर्न कांग्रेस तयार रहेको टिप्पणी गर्नुभयो ।
‘सरकारले जनताको हितमा काम गर्नुपर्छ । जुन मैले सांकेतिक रुपमा भनेको छु, संविधानले जनतालाई दिएको हकहरुलाई प्रचलनमा ल्याउनुपर्छ । प्रतिपक्षले जनताको आवाज निरन्तर उठाउनुपर्छ । प्रतिपक्षले कुरा उठाएन प्रतिपक्ष सिद्धियो, सरकारले जनहितमा काम गरेन सरकार सिद्धियो,’ उहाँले भन्नुभयो, ‘म दाबाको साथ भन्छु, प्रतिपक्षमा कांग्रेस मात्रै नभएर अन्य पार्टीले पनि साथ दिएका छन् । प्रतिपक्षले संसद्मा जनताको आवाज बुलन्द गरेको छ । यसलाई सरकारले छिटै गम्भीरतापूर्वक लिन ढिलाई गरेको छ । सरकार यसमा पेलेरै जान खोज्छ भने हामी त्यो चुनौतीको सामना गर्न तयार छौँ ।’
सरकारले सहकारी प्रकरणमा पेलेर जान खोजे कांग्रेसले नसहने भन्दै कडा रुपमा नेता सिटैलाले भन्नुभयो, ‘सरकार यही ढंगले जाने सोचमा छ भने कांग्रेस त्यसको लागि तयार छ । कांग्रेस सहेर बस्न सक्दैन । हामीले आफूमाथि अन्याय भएर होइन जनतामाथि अन्याय भएर कुरा उठाएको हो ।’
कांग्रेसको राष्ट्र निर्माणमा सबैलाई साथ लिएर हिँड्ने कल्चर भएको उल्लेख गर्दै नयाँ पुरानालाई लिएर कांग्रेस देश हाक्न सक्षम भएको सिटौलाले धारणा राख्नुभयो ।