लगानीका लागि नेपालको उदार नीतिले सहज व्यवस्था गरेको छ : देउवा

काठमाडौँ, १६ वैशाख । पूर्वप्रधानमन्त्री एवम् नेपाली कांग्रेसका सभापति शेर बहादुर देउवाले वैदेशिक लगानी प्रवर्द्धन गर्न र लगानीसम्बन्धी प्रमुख मुद्दाहरूमा सहमति कायम गर्न राजनीतिक दलहरु एकजुट हुन प्रतिबद्ध रहेको बताउनुभएको छ ।

नेपालमा विदेशी लगानीकर्ताका लागि प्रायः सबै क्षेत्र खुला रहेको बताएका उनले ढुक्क भएर लगानी गर्न आग्रह गर्नुभयो ।

आइतबारदेखि काठमाडौँमा सुुरु भएको तेस्रो लगानी सम्मेलनलाई सम्बोधन गर्दै प्रमुख प्रतिपक्षी दलका नेता समेत रहनुभएका सभापति देउवाले नेपालमा लगानीका लागि उदार नीतिले सहज व्यवस्था गरेको बताउनुभयो । नेपालमा बढीभन्दा बढी लगानी भित्र्याउनका लागि सरकारसँगै राजनीतिक दलहरु पनि मुख्य विषय र मुद्दाहरुमा एकजुट भएर लाग्ने उहाँले बताउनुभयो ।

‘सबै प्रमुख राजनीतिक दलहरू नेपालमा वैदेशिक लगानी प्रवर्द्धन गर्न र लगानीसम्बन्धी प्रमुख मुद्दाहरूमा सहमति कायम गर्न एकजुट हुन प्रतिबद्ध छन्’ देउवाले भन्नुभयो ।

सबै क्षेत्रमा विदेशी लगानीकर्ताका लागि नेपाल खुला रहेको सन्देश दिनुभएका देउवाले नीतिगत व्यवस्था पनि लगानीकर्ताका लागि उदार रहेको बताउनुभयो ।

देउवाले भन्नुभयो, ‘विदेशी लगानीका लागि खुला क्षेत्र, कर नीति र आम्दानी फिर्ता गर्ने सन्दर्भमा नेपालको लगानी व्यवस्था अहिले उदार छ । विदेशी लगानीका लागि प्रायः सबै क्षेत्र खुला छन् । कृषि, पर्यटन, पूर्वाधार विकास, खानी तथा खनिज, उत्पादन, पर्यटन, जलविद्युत र सूचना प्रविधि जस्ता प्रमुख क्षेत्र हुन् जहाँ स्वदेशी तथा विदेशी लगानीले परिवर्तनकारी प्रभाव पार्नेछ ।’

नेपाललाई लगानीको आकर्षक गन्तव्यका रूपमा प्रवर्द्धन गर्न सरकारले विभिन्न देशसँग द्विपक्षीय लगानी संरक्षण सम्झौता गर्न इच्छुक रहेको पनि देउवाले सुनाउनुभयो ।

उहाँले सार्वजनिक–निजी साझेदारी अन्तर्गतका ठुला परियोजनाहरू र अन्य साना तथा मझौला आकारका लगानीका आयोजनाहरूका लागि उद्योग विभागअन्तर्गतको लगानी बोर्ड समावेश गरी सहजीकरण गर्ने उल्लेख गर्दै ढुक्क भएर लगानी गर्न सरोकारवालालाई आग्रह गर्नुभयो ।

लोकतान्त्रिक ढाँचा अन्तर्गत आर्थिक विकासलाई अगाडि बढाउन बजार र निजी क्षेत्रको महत्वपूर्ण भूमिका रहेको अवस्थामा हामी उदार आर्थिक नीति अवलम्बन गर्ने सन्देश आफूले दिन चाहेको समेत बताउनुभयो ।

‘आन्तरिक र बाह्य आर्थिक परिवेशमा आएको परिवर्तनलाई ध्यानमा राखी लगानीको व्यवस्था मिलाउन हामी सुसंगत र व्यवहारिक रूपमा सुधारको प्रयास जारी राख्छौँ । विदेशी लगानीकर्ताहरूप्रति भेदभावपूर्ण नीति अवलम्बन गर्दैनौँ । उनीहरूलाई राष्ट्रिय लगानीकर्तासँग समान व्यवहार गरिन्छ । हामी विदेशी लगानीकर्ताहरूलाई हाम्रो मूल्यवान अतिथिको रूपमा स्वागत गर्दछौं,’ देउवाले सम्बोधनमा भन्नुभयो ।

नेपालमा वैदेशिक लगानी नाफामुखी छ भन्ने प्रमाणित गर्न भरपर्दो उदाहरणहरु रहेको बताउनुभएका उहाँले सबैलाई लगानी गर्न आह्वान गर्दै लगानीकर्ताका लागि पूर्ण सुरक्षा प्रदान गर्दै सुरुदेखि अन्त्यसम्म निरन्तर सहयोग गर्ने आश्वासन दिनुभयो ।