आजदेखि नयाँ शैक्षिक सत्र सुरु, सबै बालबालिकालाई विद्यालय पठाउन प्रधानमन्त्रीको आग्रह
काठमाडौँ, २ वैशाख । प्रधामन्त्री पुष्पकमल दाहाल ‘प्रचण्ड’ले नयाँ शैक्षिक सत्र सुरु भएको उल्लेख गर्नुहुँदै विद्यालय जाने उमेरका बालबालिकाहरुलाई पायक पर्ने विद्यालयमा भर्ना गराई सबै बालबालिकालाई नियमित रुपमा विद्यालय पठाउनका आह्वान गर्नुभएको छ ।
आइतबार एक विज्ञप्ति जारी गर्नुहुँदै प्रधानमन्त्री प्रचण्डलले ‘सबै बालबालिकाको विद्यालयमा सहभागिता, गुणस्तरीय शिक्षा प्राप्तिको सुनिश्चितता’ भन्ने संकल्पका साथ २०८१ को नयाँ शैक्षिक सत्र आजदेखि सुरु भएकाले विद्यार्थी भर्ना अभियानमा सरिक हुन सबैमा शुभकामनासहित आग्रह गर्नुभएको हो ।
शिक्षा पाउनु हरेक बालबालिकाको संविधानप्रदत्त एवं जन्मसिद्ध मौलिक अधिकार भएको र त्यसको पूर्ण कार्यान्वयन गर्न सरकारले प्रयास गरिरहेको प्रचण्डले उल्लेख गर्नुभयो ।
‘मौलिक हकको पूर्ण कार्यान्वयन गर्न नेपालको संविधान र निःशुल्क शिक्षासम्बन्धी ऐनबमोजिम २०८५ वैशाखभित्र आधारभूत तहको शिक्षा अनिवार्य सुनिश्चित गराउनुपर्ने कार्यभार हामीसामु छ,’ उहाँले भन्नुभयो ।
प्रधानमन्त्री प्रचण्डले सबै बालबालिकालाई विद्यालयमा भर्ना सुनिश्चितता गर्नुपर्ने तथा शैक्षिक सत्रको बीचमा नै विद्यालय छाड्ने अवस्थाको अन्त्य गर्नुपर्नेमा जोड दिनुभएको छ ।
‘हाम्रासामु एकातर्फ विद्यालय जाने उमेरका सबै बालबालिकालाई विद्यालयमा भर्ना सुनिश्चितता गर्नुपर्ने र अर्कातर्फ बीचमा नै विद्यालय छाड्ने अवस्था अन्त्य गर्नुपर्ने जिम्मेवारी छ । यसका लागि समुदाय तहबाट नै ठोस पहल गर्दै सुधार ल्याउन आवश्यक छ’ दाहालले भन्नुभयो ।
विद्यालय शिक्षामा संघ, प्रदेश र स्थानीय सरकारले आफ्नो सामर्थ्यले भ्याएसम्म लगानी गर्दै आएको उल्लेख गर्नुभएका दाहालले विद्यालय शिक्षा सुधारका प्रयासहरुलाई सघन तुल्याउँदै थप परिणाममुखी बनाउन थप सामूहिक प्रयास केन्द्रित गर्नुपर्नेमा जोड दिनुभयो ।