आइसिसी यू–१९ विश्वकप क्रिकेट : नेपाल सुपर सिक्समा
काठमाडौँ, १३ माघ । अफगानिस्तानसँग जित निकाल्दै नेपाल आइसिसी यू–१९ विश्वकप क्रिकेट प्रतियोगिताको दोस्रो चरणमा प्रवेश गरेको छ । पहिलो समूह चरणको अन्तिम खेलमा अफगानिस्तानलाई एक विकेटले हराउँदै नेपालले ‘सुपर सिक्स’मा स्थान बनाएको हो
दक्षिण अफ्रिकामा टस जितेर पहिला ब्याटिङ गर्दै निर्धारित ५० ओभरको खेलमा अफगानिस्तानले ४०.१ ओभरमा सबै विकेट गुमाउँदै १४५ रन बनायो । नेपालले १४६ रनको विजयी लक्ष्य ४४.४ ओभरमा नौ विकेट गुमाएर पूरा गर्यो। नेपालका लागि कप्तान देव खनालले अर्धशतकीय पारी खेले । उनले ७३ बल खेल्ने क्रममा सात चौकाको मद्धतमा ५८ रन बनाए । यस्तै, दिपक बोहराले २७, आकाश त्रिपाठीले १६, अर्जुन कुमालले १० तथा सुवाश भण्डारीले अविजित नौ रन बनाए ।
बलिङतर्फ अफगानिस्तानका फरिदुन दाउदजाइले तीन, खलिल अहमद र नासिर खानले दुई-दुई तथा अल्लाह मोहम्मद घजानफार र अरब गुलले एक-एक विकेट लिए ।
अफगानिस्तानका लागि ब्याटिङ गर्ने क्रममा अल्लाह मोहम्मद घजानफारले सर्वाधिक ३७ रनको योगदान दिए । उनले २१ बल खेल्ने क्रममा चार चौका र तीन छक्का हिर्काए । त्यस्तै, नासिर खानले ८३ बलको सामना गर्दै तीन चौकाको मद्धतमा ३१ रन बनाए । फरिदुन दाउदजाइले २९ तथा हसन इसाखिलले २० रन बनाए ।
बलिङतर्फ नेपालका आकाश चन्द एक्लैले पाँच विकेट लिए । उनी ‘प्लेयर अफ दी म्याच’ घोषित भए । यस्तै, दिपेश कँडेलले दुई तथा गुल्सन झा, सुवास भण्डारी र तिलक भण्डारीले एक-एक विकेट लिए ।