पोखरा, २ कात्तिक । पोखराको फेवातालमा डुंगा चलाउने चालकहरूको मादव पदार्थ सेवन (मापसे) जाँच गरिएको छ ।
बुधबार दिउँसो कास्की पोखरा महानगरपालिका वडा नम्बर ६ लेकसाइडस्थित फेवातालमा डुंगा चालकहरूको मापसे जाँच गरिएको जिल्ला प्रहरी कार्यालय कास्कीले जनाएको छ ।
समय समयमा डुंगा दुर्घटना हुने घटनालाई मध्यनजरमा राखेर वडा प्रहरी कार्याल बैदाम र अस्थायी ट्राफिक पोष्ट बैदामले चालकहरूको मापसे जाँच गरेको हो ।
बुधबार गरिएको जाँचमा कसैले पनि मापसे नगरेको अस्थायी ट्राफिक पोष्टका प्रमुख वरिष्ठ नायब निरीक्षक राजकुमार केसीले जानकारी दिए । उनले डुंगामा सवार गर्ने यात्रु र चालकको सुरक्षाका लागि केही समयअघि पनि यसरी मापसे जाँच गरिएको बताए ।
यात्रुहरूले लाइफ ज्याकेट लगाए/नलगाएको पनि हेर्ने गरिएको उनले बताए । यसरी कसैले मापसे गरेको पाइएमा अहिलेलाई सचेत गराउने गरेको पनि उनी बताउँछन् ।