अष्ट्रेलियालाई पराजित गर्दै दक्षिण अफ्रिका शीर्ष स्थानमा
काठमाडौँ, २५ असोज । विश्वकप क्रिकेट प्रतियोगिता अन्तर्गतको बिहीबार भएको खेलमा दक्षिण अफ्रिकाले अष्ट्रेलियालाई १३४ रनले पराजित गरेको छ । भारतको लखनउमा भएको खेलमा ३१२ रनको लक्ष्य पछ्याएको अष्ट्रेलिया ४०.५ ओभरमा १७७ रनमा समेटियो ।
यसअघि टस हारेर पहिले ब्याटिङ गरेको दक्षिण अफ्रिकाले ५० ओभर खेल्दै सात विकेटको क्षतिमा ३११ रन बनाएको थियो । दक्षिण अफ्रिकाका लागि क्विन्टन डि ककले शतकीय पारी खेले । उनले १०६ बल खेल्दै आठ चौका र पाँच छक्काको मद्धतमा सर्वाधिक एक सय नौ रनको योगदान दिए । यस्तै एडेन माक्रमले ५६ रन बनाए । उनले ४४ बल खेल्दै सात चौका र एक छक्का हाने ।
यसैगरी, कप्तान टेम्बा बभुमाले ५५ बल खेल्दै दुई चौकासहित ३५, रास्सी भान डर डुसेन ३० बलमा दुई चौकासहित २६, हेनरिक क्लासेन २७ बल खेल्दै तीन चौकासहित २९, मार्को यानसनले २२ बलमा तीन चौका र एक छक्कासहित २६ तथा डेविड मिलरले १३ बल खेल्दै एक चौका र एक छक्कासहित १७ रन बनाए ।
बलिङतर्फ अष्ट्रेलियाका ग्लेन म्याक्सवेल र मिचेल स्टार्कले दुई-दुई तथा एडम जाम्पा, जोश हेजलवुड र प्याट कमिन्सले एक-एक विकेट लिए ।
लक्ष्य पछ्याएको अष्ट्रेलियाको सुरुवात राम्रो भएन । उसका लागि ओपनर मिचेल मार्सले सात र डेभिड वार्नरले १३ रन मात्रै बनाउन सके । अष्ट्रेलियाका लागि सबैभन्दा बढी मार्नस लाबुसनले ४६ रन बनाए भने मिचल स्टार्कले २७, कप्तान प्याट कमिन्सले २२ र स्टेभन स्मिथले १९ रन बनाए ।
दक्षिण अफ्रिकाका लागि कासिगो रबडाले तीन विकेट लिए । साथै मार्को जानसन, केशव महाराजा, तबरेज शाम्सीले दुई–दुई विकेट लिए भने लुंगी एनगिडीले एक विकेट लिए । जितसँगै दक्षिण अफ्रिका अंक तालिकामा पहिलो नम्बरमा पुगेको छ ।