किट्सकै अभावमा क्षमतावान् खेलाडी पलायन भए, अझै हुने क्रममा छन् : ललित राजवंशी
काठमाडौँ, २७ भदौ । नेपाली राष्ट्रिय क्रिकेट टोलीका बलर ललितनारायण राजवंशीले ब्याटमात्र समस्याको समाधान नभएको बताएका छन् ।
अन्तर्राष्ट्रिय क्रिकेटका लागि आफूसँग ‘क्रिकेट ब्याट नभएको’ विषयमा प्रतिक्रिया दिँदै उनले यस्तो बताएका हुन् । किट्स स्पोन्सर नहुँदा आफैँले सबै कुरा व्यवस्थापन गर्न गाह्रो भएको उनको भनाइ छ ।
‘मबाहेक पनि थुप्रै राष्ट्रिय, अन्तर्राष्ट्रियस्तरमा खेलिरहनुभएका खेलाडीहरु प्रायोजक विहीन हुनुहुन्छ । कति क्षमतावान् खेलाडीहरु किट्सकै अभावमा पलाएन भएका छन्, हुने क्रममा छन्,” उनले सामाजिक सञ्जालमा भनेका छन्, “मैले त जेनतेन व्यवस्था गरिरहेको छु, चलिरहेको छ तर समग्र यो क्षेत्रमा प्रतिभा भएका तर आर्थिक अवस्था कमजोर भएका खेलाडीहरुको के हुन्छ ?”