खाँदबारी, ४ भदौ । सङ्खुवासभाको कारागारभित्र दुई कैदीको हत्या प्रकरणमा प्रहरीसहित १२ जनाविरूद्ध कर्तव्य ज्यानमा मुद्दा दर्ता भएको छ ।
कैदीको हत्या प्रकरणमा संलग्न देखिएका प्रहरी, चौकरीदार र कैदीसहित १२ जनाविरूद्ध कर्तव्य ज्यानसम्बन्धी मुद्दा दर्ता गरेर अनुसन्धान थालिएको हो । कारागारमा रहेको सिसिटिभी फुटेज अध्ययनबाट प्रहरी र चौकीदारसहित केही कैदीको संलग्नता देखिएको थियो ।
कैदी मृत्यु प्रकरणमा प्रहरीसहित १२ जनाविरूद्ध कर्तव्य ज्यानमा मुद्दा दर्ता गरेर अनुसन्धान भइरहेको जिल्ला प्रहरी कार्यालय सङ्खुवासभाका प्रहरी नायब उपरीक्षक (डिएसपी) वीरेन्द्र गोदारले जानकारी दिए । अनुसन्धान टोलीको प्रतिवेदन आएपछि थप कारबाहीको प्रक्रिया अघि बढ्ने डिएसपी गोदारले बताए ।
घटनालगत्तै गृह मन्त्रालयले कारागार विभागका निर्देशक कमलप्रसाद पाण्डेको नेतृत्वमा ५ सदस्यीय छानबिन टोली बनाएको थियो । मन्त्रालयले छानबिन टोलीलाई १० दिनभित्र कारागार घटनाको प्रतिवेदन बुझाउन निर्देशन दिएको थियो ।
कैदी मृत्यु प्रकरणमा प्रत्यक्ष संलग्न देखिएका ५ प्रहरीलाई विभागीय कारबाहीका लागि सिफारिस गरिएको छ । कारागार सुरक्षा इञ्चार्ज प्रहरी सहायक निरीक्षक (असई) लक्ष्मी चौधरीमाथि जिल्ला अदालतबाट भदौ १ गते दोस्रो पटक पुनः म्याद थप गरेर अनुसन्धान भइरहेको छ ।
पीडितले दिएको किटानी जाहेरीका आधारमा असई चौधरीसहित कारागार निमित्त प्रमुख राजेन्द्र घिमिरेविरूद्ध जिल्ला अदालत सङ्खुवासभाले गत साउन २८ गते पक्राउका लागि अनुमति दिएको थियो । कारागार निमित्त प्रमुख घिमिरेलाई भने हालसम्म पक्राउ गरिएको छैन ।
कुटपिटबाट सङ्खुवासभाको मादी नगरपालिका–५ का २० वर्षीय विनोद तोलाङ्गी र नुवाकोट ककनी गाउँपालिका–७ का २८ वर्षीय आकाश बलामीको साउन २४ गते बुधबार बिहान मृत्यु भएको थियो ।
२५ जनाको क्षमता रहेको कारागारमा अहिले १३६ जना कैदीबन्दी छन् ।
सम्बन्धित समाचार
- कैदी मृत्यु प्रकरण : प्रहरीसहित १२ जनामाथि अनुसन्धान जारी
- कैदी मृत्यु प्रकरणमा प्रहरी र चौकीदारसहितका कैदीको संलग्नता देखियो : छानबिन समिति
- कैदीबन्दी मृत्यु प्रकरण : कुटपिटपछि कारागारमै मृत्यु भएको मानव अधिकार आयोगको निष्कर्ष
- कैदीबन्दी मृत्यु प्रकरण : कारागारका निमित्त प्रमुख र असईविरूद्ध पक्राउ पुर्जी जारीपछि आफन्तले बुझे शव
- कैदीबन्दी मृत्यु प्रकरण : असई चौधरी पक्राउ, ५ दिन हिरासतमा राख्न अनुमति
- कैदी मृत्यु प्रकरण : कारागार प्रमुख र सुरक्षाकर्मीविरूद्ध किटानी जाहेरी, अझै आफन्तले शव बुझ्न मानेनन्
- ‘कैदी मृत्यु प्रकरणको निष्पक्ष छानबिन हुन्छ’
- कैदी मृत्यु प्रकरण : घटनामा संलग्न १० प्रहरीसहित १५ नियन्त्रणमा
- कैदी मृत्यु प्रकरण : छानबिन गर्न कोशी प्रदेश प्रहरी खाँदबारीमा
- कारागारभित्र कैदी मृत्यु प्रकरण : आफन्तद्वारा निष्पक्ष छानबिनको माग
- कैदी मृत्यु प्रकरण : परिवारले शव बुझ्न मानेनन्
- सङ्खुवासभा कारागारमा २ जनाको मृत्यु प्रकरण : कुटपिटको आरोपमा ९ जना नियन्त्रणमा