सुन तस्करी प्रकरणमा एक चिनियाँ नागरिक पक्राउ
काठमाडौँ, ४ साउन । झन्डै एक सय किलो सुन तस्करी प्रकरणमा संलग्न रहेको आरोपमा आज त्रिभुुवन अन्तर्राष्ट्रिय विमानस्थलबाट एक जना चिनियाँ नागरिक पक्राउ परेका छन् ।
उनीसँगै अहिलेसम्म सुन तस्करी प्रकरणमा ७ जना पक्राउ परिसकेका छन् । आज पक्राउ पर्नेमा चिनियाँ नागरिक जेयुङ लिन रहेका विमानस्थल सुरक्षा कार्यालयका प्रहरी उपरीक्षक पदमबहादुर विष्टले जानकारी दिए ।
उनका अनुसार तिब्बतीयन एयरलाइन्सबाट चीन जान लागेका बेला उनलाई पक्राउ गरी राजश्व अनुसन्धान विभागमा पठाइएको छ । विभागले बुधबार त्रिभुुवन अन्तर्राष्ट्रिय विमानस्थल भन्सार कार्यालय अगाडिबाट झन्डै एक क्विन्टल सुन बरामद गरेको थियो ।
भन्सार पास भएर बाहिरिन लाग्दा विभागको टोलीले ट्याक्सीसहित २ जनालाई पक्राउ गरेको थियो । उनीहरूसँगको अनुसन्धानपछि राति नै विभागले थप ४ जनालाई पक्राउ गरेको थियो । उक्त सुन हङकङबाट रेडी ट्रेड प्रालिको नाममा आएको खुलेको छ । त्यसका सञ्चालक पनि पक्राउ परेका छन् ।
स्कुटरको ‘ब्रेक सु’को नाममा लुकाएर यसरी सुन बरामद भएको हो ।