ट्विटरको नयाँ सिइओमा लिन्डा याक्कारिनो नियुक्त

34

काठमाडौँ, ३० वैशाख । सामाजिक सञ्जाल ट्विटरले लामो समयपछि प्रमुख कार्यकारी अधिकृत (सिइओ) पाएको छ । एलन मस्कले ट्विटरको नयाँ सिइओमा एनबिसी युनिभर्सलकी पूर्वविज्ञापन प्रमुख लिन्डा याक्कारिनोलाई नियुक्त गरेका हुन् ।

ट्विटरको स्वामित्व खरिदको केही समयपछि मस्कले कम्पनीको कार्यकारी भूमिकामाथि हस्तक्षेप गर्दै सबै जिम्मेवारी लिएका थिए । उनको उक्त भूमिका विवादास्पद रहन पुग्यो । विवादास्पद हस्तक्षेपको ६ महिनापछि मस्कले ट्विटरको नयाँ सिइओको नाम घोषणा गरेका हुन् ।

करिक ६ हप्तापछि याक्कारिनोले नयाँ कार्यभार सम्हाल्ने बताइएको छ । मस्कले ट्विटरमार्फत् नयाँ सिइओको नाम घोषणा गरेका हुन् । नाम घोषणाको एक दिन अगाडि नै मस्कले नयाँ सिइओ फेला परेको उल्लेख गरेका थिए ।

नयाँ सिइओ नियुक्तिसँगै आफू कार्यकारी अध्यक्ष र चिफ टेक्नोलोजी अफिसरको भूमिकामा रहने मस्कले बताएका छन् । याक्कारिनोले बिजनेस हेर्ने र आफूले प्रडक्ट डिजाइन तथा नयाँ प्रविधि हेर्ने उनले जानकारी दिएका छन् ।

एनबिसी युनिभर्सलमा १२ वर्ष बिताएकी याक्कारिनोले विज्ञापनको क्षेत्रमा ट्विटरलाई निकै ठुलो फाइदा पुर्‍याउने अपेक्षा गरिएको छ ।

मस्कले गत वर्ष ४४ अर्ब अमेरिकी डलरमा ट्विटर खरिद गरेका थिए । ट्विटर खरिद गरेदेखि नै त्यसको सिइओ पद आफैँ सम्हाल्दै आधा जसो कर्मचारी कटौती गर्नेदेखि लिएर खातामा प्रमाणित गर्ने निलो टिकका लागि मासिक ८ डलर शुल्क लिने जस्ता निर्णय गरेर विवादित बन्दै आएका छन् ।

Share This:
सम्बन्धित खबर
Loading...