रौतहट गोली काण्ड : एकको मृत्यु, बन्दुकसहित ९ जना नियन्त्रणमा
काठमाडौँ, २ वैशाख । रौतहट जिल्लाको गढीमाई नगरपालिका–८ धोबिनियामा सडक खन्ने क्रममा विवादका क्रममा गोली चल्दा एक जनाको मृत्यु भएको छ । शनिबार साँझ भएको झडपमा अन्य ४ जना घाइते भएका छन् ।
गोली लागेर गम्भीर घाइते भएका राजकुमार राय यादवको उपचारका क्रममा वीरगञ्ज मेडिकद कलेजमा मृत्यु भएको रौतहटका प्रमुख जिल्ला अधिकारी धर्मेन्द्र कुमार मिश्रले जानकारी दिए । घाइते अन्य ४ जनाको स्थानीय ग्रान्डी अस्पतालमा उपचार भइरहेको छ ।
रौतहट प्रहरी प्रमुख उपरीक्षक (एसपी) वीर बहादुर बुढा मगरका अनुसार घाइते निरञ्जन यादवको खुट्टामा गोली लागेको छ । उनीहरू सबैको अवस्था सामान्य छ ।
प्रजिअ मिश्रका अनुसार घटनामा संलग्न ९ जनालाई प्रहरीले नियन्त्रामा लिएको छ भने स्थानीय रामेश्वर राय यादवको घरबाट १२ बोरको बन्दुक बरामद गरेको छ ।
अहिले घटनामा संलग्न अन्यको खोजी कार्य भइरहेको र सीमामा उच्च सतर्कता अपनाइएको छ ।