एकदिवसीय वरीयतामा नेपालको सुधार
काठमाडौँ, २३ चैत । नेपालले अन्तर्राष्ट्रिय क्रिकेट परिषद् (आइसिसी) को नयाँ एकदिवसीय वरीयतामा फेरि एक स्थान माथि उक्लिएको छ ।
आइसिसीले बुधबार साँझ सार्वजनिक गरेको नयाँ एकदिवसीय वरीयतामा नेपालले एक स्थान सुधार गर्दै १४औँ स्थानमा उक्लिएको हो ।
पछिल्लो समयमा नेपालले अन्तर्राष्ट्रिय क्रिकेटमा जित हासिल गर्दै खेल सुधार गरेपछि १५औँ स्थानबाट एक स्थान माथि उक्लिँदै १४ स्थानको वरीयता कायम गर्न सफल भएको हो । नेपालभन्दा अघि वरीयतामा एसोसिएट टोलीको रुपमा स्कटल्यान्ड मात्रै परेको छ ।
नेपालभन्दा अघि जिम्बावे १३औँ, स्कटल्यान्ड १२औँ र आयरल्यान्ड ११औँ स्थानमा छन् भने नेपाल भन्दापछि ओमान १५औँ, नेदरल्यान्ड्स १६औँ, अमेरिका १७औँ र नामिबिया १८औँ स्थानमा रहेका छन् । नेदरल्याण्ड दुई स्थान तल झरेर १६औँ स्थानमा पुग्दा नेपाल एक स्थान माथि उक्लिएको हो ।
वरीयतामा अष्ट्रेलिया शीर्ष स्थानमा रहेको छ भने न्युजिल्यान्ड दोस्रो र भारत तेस्रो स्थानमा छन् ।