सङ्खुवासभामा भोटखोलाको मतपेटिका हेलिकोप्टरमार्फत् ल्याइने
खाँदबारी, ५ मंसिर । सङ्खुवासभाको चीनसँग सीमा जोडिएको उत्तरी क्षेत्र भोटखोला गाउँपालिकाको मतपेटिका हेलिकोप्टरमार्फत् ल्याइने भएको छ ।
भोटखोला गाउँपालिकाको किमाथांका, थुदाम र रिदाक मतदान केन्द्रको मतपेटिका हेलिकोप्टरमार्फत् ल्याइने भएको हो ।
भौगोलिक रूपमा विकट र दुर्गम मानिएको भोटखोला गाउँपालिकाको दुधपोखरी आधारभूत विद्यालय थदाम, हिमालय आधारभूत विद्यालय किमाथांका र ज्योति आधारभूत विद्यालय रिदाक मतदान केन्द्रको मतपेटिका सोमबार हेलिकोप्टरमार्फत् ल्याउने सहायक निर्वाचन अधिकृत इन्द्र सापकोटाले जानकारी दिए ।
सडक सञ्जाल नजोडिएको र भौगोलिक हिसाबले निकै विकट भएकाले हेलिकोप्टरमार्फत् ल्याउन लागिएको उनले बताए ।