उच्च अदालत तुलसीपुरकी न्यायाधीश शाहलाई न्याय परिषद्ले गर्यो बर्खास्त
काठमाडौँ, २५ असार । उच्च अदलत तुलसीपुरको बुटवल इजलासकी न्यायाधीश रेणुका शाहलाई न्याय परिषद्ले बर्खास्त गरेको छ ।
शुक्रबार बसेको न्याय परिषद्को बैठकले शाहलाई अयोग्यता लुकाएको आरोपमा बर्खास्ता गरेको हो ।
कायममुकायम प्रधानन्यायाधीश दीपककुमार कार्कीको अध्यक्षमा बसेको परिषद्को बैठकले न्यायाधीश शाहलाई बर्खास्त गर्ने निर्णय गरेको हो ।
न्याय परिषद्का प्रवक्ता मानबहादुर कार्कीका अनुसार न्यायाधीश शाहलाई योग्यता नपुगेको कारणले पदबाट बर्खास्त गरिएको हो । शाहले छानबिनबाट अयोग्यता लुकाएको प्रमाणित भएकाले न्याय परिषद् ऐनको दफा २५ अनुसार बर्खास्त गरिएको उनले बताए ।
उच्च अदालतको न्यायाधीश हुनलाई कानुनमा स्नातक पास गरी कम्तीमा १० वर्ष वकालत हुनु पर्ने छ ।
२०७५ चैत १९ मा उनलाई नियुक्ति गरिएको थियो । नियुक्ति हुनुअघि उनले आफ्नो प्रमाणपत्र पेस गरेकी थिइन् । तर, छानबिनको क्रममा उक्त प्रमाणपत्र झुटो ठहरियो ।
शाह पूर्वप्रधानन्यायाधीश रामकुमारप्रसाद शाहकी छोरी हुन् ।