नेपालले क्यानडासँग टी–२० र एकदिवसीय सिरिज खेल्ने
काठमाडौँ, ३ असार । नेपाली राष्ट्रिय क्रिकेट टिमले दुई टी–२० र एकदिवसीय खेलको शृंखलाका लागि क्यानडा भ्रमण गर्ने भएको छ ।
आइसिसी विश्वकप क्रिकेट लिग २ अन्तर्गत त्रिदेशीय शृंखलाका लागि हाल अमेरिका भ्रमणमा रहेको नेपाली टिम सोही स्थानबाट शृंखलाका लागि क्यानडा जाने नेपाल क्रिकेट संघ (क्यान) ले जनाएको छ ।
नेपालले विश्वकप क्रिकेट लिग २ अन्तर्गत स्कटल्यान्डविरुद्धको शृंखलाअघि क्यानडा भ्रमण गर्न लागेको हो ।
नेपालले क्यानडामा घरेलु टिमविरुद्ध पहिले टी–२० शृंखला खेल्ने छ । नेपालले जुन २८ मा पहिलो टी–२० खेल खेल्ने छ । यस्तै, नेपालले जुन २९ मा दोस्रो खेल खेल्ने छ ।
नेपालले जुलाई चारमा एकदिवसीय शृंखलाको पहिलो खेल खेल्ने छ । यस्तै, जुलाई पाँचमा नेपालले दोस्रो एकदिवसीय खेल खेल्ने छ ।
लिग २ का लागि अमेरिका भ्रमणमा रहेको नेपाली टिमले घरेलु टिमसहित ओमान सहभागी रहेको त्रिदेशीय शृंखला खेलेको थियो । शृंखलाको चार खेलमध्ये दुई खेलमा हार बेहोर्दा एक खेलमा जित निकालेको थियो । यस्तै, एक खेल भने ‘टाइ’ भएको थियो ।