मञ्जु शर्मा भन्छिन्– महिलाको सहभागिता र संविधानको रक्षाका लागि मेयरमा मेरो उम्मेदवारी

• थम्मन थापा

बागलुङ, १६ वैशाख । स्थानीय तह निर्वाचन ऐन, २०७३ को दफा ४ को उपदफा (१) मा नगरपालिका, गाउँपालिका तथा जिल्ला समन्वय समितिको प्रमुख वा उपप्रमुखमध्ये एक पदमा महिलासहित उम्मेदवारी दिनुपर्ने व्यवस्था छ । आगामी वैशाख ३० गते हुन गइरहेको स्थानीय तह निर्वाचनमा गठबन्धनको नाममा महिला उम्मेदवारको सहभागिता अत्यन्तै न्यून छ ।

तथ्याङ्क र अध्ययनहरूमा आम नागरिकमा राजनीतिप्रति चासो बढेको, सामाजिक न्याय र सामाजिक सुरक्षा बढेको, महिला अधिकारहरू कार्यान्वयनमा रहेको, राजनीतिक सोचको विकास भएको, महिला अधिकारको पक्षमा महिला मात्रै नभइ पुरुषहरू पनि सक्रिय रहेको लगायतका कुराहरू उल्लेख गरिन्छन ।

केन्द्रमा पाँच दलीय गठबन्धन रहेता पनि गलकोट नगरपालिकामा ३ दल नेपाली कांग्रेस, नेकपा (माओवादी केन्द्र) र राष्ट्रिय जनमोर्चाबीच चुनावी तालमेल भएको छ । गठबन्धनको नाममा संविधानमा व्यवस्था भएको अधिकारबाट महिलालाई लत्ताएर उम्मेदवार हुनबाट राजनैतिक दलले वञ्चित गरेपछि गलकोट नगरपालिकाको नगर प्रमुखमा मञ्जु शर्मा चालिसेले स्वतन्त्र उम्मेदवारी दिएकी छन् ।

चालिसेले पत्रकार भेटघाटमार्फत् आफ्नो उम्मेदवारी वैशाख १६ गते मनोनयन फिर्ता लिने समय सम्मलाई नभइ गलकोट नगरपालिकामा महिला नेतृत्वको सहभागितासहित संविधानको रक्षा, महिला हक, अधिकारको निमित्त भएको स्पष्ट पारेकी छन् ।

नेपाली कांग्रेसमा लामो समय देखि आवद्ध महिला नेतृ चालिसेले पार्टीको दबाब, प्रभाव र प्रलोभनमा परी उम्मेदवारी फिर्ता नगर्ने बताइन् । उनले बाहिर एकखाले भ्रम छर्दै उम्मेदवारी फिर्ता हुने भन्ने चर्चा केवल भ्रमको खेती रहेको बताउँदै उम्मेदवारी फिर्ता नहुने तर पार्टीले कारबाही गरे त्यो भोग्न तयार रहेकोसमेत उल्लेख गरिन् ।

नेपाली कांग्रेसले स्थानीय निर्वाचनमा उम्मेदवार छनोट गर्दा स्वेच्छाचारी र तानाशाह प्रवृत्तिबाट निर्णय गरेको बताउँदै आफूले गलकोटबासी नागरिकको चाहनाअनुसार नगर प्रमुख पदमा स्वतन्त्र उम्मेदवारी दिएको उनको भनाइ छ । शर्माले नेतृत्वले अवसर नदिएकाले महिलाहरुमा क्षमता भएर पनि असक्षम बनाउने काम गरेको तथा आफूले विगत २५ वर्षदेखि स्वास्थ्य, महिला अधिकार र समाजसेवाको क्षेत्रमा क्रममा गरेका योगदानको समेत कदर नभएको गुनासो गरिन् ।

“२० वर्ष स्वास्थ्य उपचारका निमित्त सेवा गरेँ, गलकोटका दुरदराजमा रहेका महिलाहरुको प्रसव पीडादेखि विभिन्न स्वास्थ्य समस्याबारे बुझेकी छु,” शर्माले भनिन् “हरेक प्रसव तथा सुत्केरी महिलाहरुको समस्या समाधान र गलकोट नगरको पहिलो महिला नगर प्रमुखका लागि मैले उम्मेदवारी दर्ता गराएकी हुँ ।”

उनको गलकोट नगरपालिका वडा नम्वर १, २ र ४ मा सचिवालय स्थापना भएको र अन्य वडामा छिट्टै सचिवालय स्थापना गरी आम नागरिकसँग प्रत्यक्ष अन्तरक्रिया गरेर आवश्यकता अनुरुप घोषणा पत्र सार्वजनिक गर्ने बताइन् । गलकोटमा स्वास्थ्य, शिक्षा, सुशासन, यातायात, कृषि, पशुपालन, पर्यटन, संस्कृति र खेलकुद, फोहोर व्यवस्थापन र रोजगारीको अवसर सिर्जना हुने न्यूनतम आधारहरु तयार गरी पूरा गर्न सक्ने योजनाहरु मात्र घोषणापत्रमा समावेश हुने सचिवालयले पत्रकार भेटघाटमा जनाएको छ ।

गलकोट नगरपालिकाको नगर प्रमुखमा आफू विजयी बन्ने प्रसस्त आधारहरु रहेको भन्दै नगरबासीको सामाजिक विकास, निःशुल्क तथा अनिवार्य स्वास्थ्य बीमासहित स्वास्थ्य सेवा , सरकारी स्वास्थ्य संस्थामा पर्याप्त औषधि उपचार र डक्टरको व्यवस्थापन, नगरभित्र माटो सुहाँउदो उत्पादनको आधारमा कृषि पकेट क्षेत्र कार्यक्रम, उत्पादनको बजारीकरण, फोहोर व्यवस्थापन, पक्की सडक निर्माण, महिलालाई गुणस्तरीय स्वास्थ्य सेवा, नगर प्रहरी महिला, प्रत्येक वडामा आवासीय विद्यालय, उत्पादनलाई रोजगारीसँग जोडदै स्वदेशमै युवा रहने वातावरण सिर्जना गर्न युवा लक्षित कार्यक्रम सञ्चालन पहिलो प्राथमिकतामा रहेको हुँदा नमुना नगर निर्माणका लागि गलकोटबासीले आफूलाई मतदान गर्नुपर्ने बताइन् ।

कार्यक्रममा पत्रकारहरुले उनको उम्मेदवारी किन र केका लागि साथै गलकोट नगरको विषयमा जिज्ञासा तथा प्रश्न राखेका थिए ।