प्रचण्डलाई घनश्याम भुसालको जबाफः ‘हाम्रो पार्टी हामी नै बनाउँछौँ, तपाईं आफ्नै पार्टी राम्रो बनाउनुस्’
काठमाडौँ । नेकपा (एमाले)का उपमहासचिव घनश्याम भुसालले नेकपा (माओवादी केन्द्र)का अध्यक्ष पुष्पकमल दाहाल‘प्रचण्ड’लाई आफूहरुको चिन्ता नलिन आग्रह गरेका छन् ।
बिहीबार काभ्रेको पाँचखालमा आयोजित वाइसिएल नगर भेलामा सम्बोधन गर्दै प्रचण्डले तेस्रो धारका नेताहरु धेरै दिन एमालेमा नटिक्ने अभिव्यक्ति दिएपछि भुसालले जबाफ फर्काएका हुन् । भुसालले सामाजिक सञ्जाल ट्विटरमा लेखेका छन्, “कमरेड प्रचण्ड, हाम्राबारे तपाईंको चिन्ता अत्यधिक देखिन थाल्यो । हाम्रो पार्टी हामीले नै बनाउँछौँ । तपाईंले आफ्नै पार्टी राम्रो बनाएको देख्न चाहन्छौँ ।”
प्रचण्डले काभ्रेको पाँचखालमा आयोजित वाइसिएल नेपालको दोस्रो पाँचखाल नगर सम्मेलनलाई सम्बोधन गर्दै तेस्रो धारका नेताहरु धेरै दिन एमालेमा नटिक्ने दाबी गरेका थिए । उनले भनेका थिए,“बडो दया लाग्छ ती साथीहरुलाई देख्दा, ढिलोछिटो त्यहाँबाट निस्कन्छन् । त्यहाँ बस्ने ठाउँ छैन ।”
कमरेड प्रचण्ड, हाम्राबारे तपाईंको चिन्ता अत्यधिक देखिन थाल्यो । हाम्रो पार्टी हामीले नै बनाउछौ। तपाईंले आफ्नै पार्टी राम्रो बनाएको देख्न चाहन्छौं ।
— Ghanashyam Bhusal (@gsbhusal) September 23, 2021