काठमाडौं । राष्ट्रिय पुनःनिर्माण प्राधिकरण केन्द्रीय आयोजना कार्यान्वयन इकाई (भवन) अन्र्ततका प्राविधिकहरु तत्काल कार्यक्षेत्रमा फर्केर पुनःनिर्माणका काममा क्रियाशील हुने भएका छन् ।
प्राधिकरणमा आज भएको वार्तामा इञ्जिनियरले पाउने सञ्चार, यातायात तथा स्थानीय भत्ता उपलब्ध गराउने, प्राविधिकलाई आवश्यक पर्ने तालिमका साथै विभिन्न निकायमा व्यवस्थापन गर्न पहल गर्नेलगायतका सहमति भएको छ ।
प्राधिकरणका प्रमुख कार्यकारी अधिकृत सुशील ज्ञवालीको उपस्थितिमा भएको छलफलपछि प्राधिकरणका तर्फबाट केन्द्रीय आयोजना कार्यान्वयन इकाई (भवन)का आयोजना निर्देशक श्यामकिशोर सिंह र आन्दोलनरत प्राविधिकका तर्फबाट अविनाश अमरले सहमतिपत्रमा हस्ताक्षर गरे ।
सहमतिपछि अमरले आफ्ना सबै माग पूरा भएकोमा खुसी व्यक्त गर्दै सम्पूर्ण प्राविधिकहरु काममा खटिने र असार मसान्तभित्र धेरैभन्दा धेरै लाभग्राहीको मुहारमा खुसी ल्याउने प्रतिबद्धता व्यक्त गरे ।