बहराइनका राजकुमारलाई लिन विशेष जहाज काठमाडौं आउँदै

काठमाडौं । सगरमाथा आरोहणका लागि नेपाल आएका बहराइनका राजकुमारसहितको टोलीलाई लिन विशेष जहाज काठमाडौं आउँदैछ ।

बहराइनका राजकुमार मोहम्मद हमाद अल खालिफासहितको सदस्यलाई लिन विशेष जहाज आज साँझ साढे ५ बजे काठमाडौं आउने तालिका रहेको छ । टोलीलाई लिएर जहाज भोलि मात्रै फर्कनेछ ।

सगरमाथा आरोहणका लागि राजकुमारसहित १० जनाको टोली गएको चैत २ गते नेपाल आएको थियो । उक्त टोलीले वैशाख २८ गते सगरमाथा आरोहण गरेको थियो । सगरमाथाको उचाइ बढेर ८ हजार ८४८.८६ मिटर कायम भएपछि पहिलो अन्तर्राष्ट्रिय आरोहीको रुपमा राजकुमारको टोली सगरमाथाको चुचुरोमा पुगेका थिए ।

बहराइनका राजकुमार खालिफासहितको टोलीले अघिल्लो वर्ष लोबुचे र मनास्लु हिमालको पनि सफल आरोहण गरेका थिए ।