सगरमाथा क्षेत्रमा भारी हिमपात, आरोहीको उद्धारमा समस्या
सोलुखुम्बु । सगरमाथा क्षेत्रमा भारी हिमपात हुँदा आरोहण प्रभावित भएको छ । मंगलबारदेखि मौसममा खराबी भएसँगै बाक्लो हिउँ परेकाले आरोहीहरुको उद्धारमा समेत समस्या भएको हो ।
आरोहणका लागि चौथो आधार शिविरसम्म पुगेका सबै जनाको आरोहण स्थगित गरी दोस्रो शिविरमा ल्याइए पनि त्यहाँबाट आधार शिविरसम्म झार्न समस्या भएको छ ।
अहिले तीन दर्जन आरोहीसहित १ सय जनाभन्दा बढी दोस्रो आधार शिविरमा अड्किएको आधार शिविरका सम्पर्क अधिकृत खिमलाल गौतमले जानकारी दिए ।
दोस्रो आधार शिविरमा रहेका सामान तल झार्नका लागि उच्च हिमाली कामदारहरुसमेत माथि जान नसकेको उनले बताए ।
आरोहण सफल गरेर फर्किएका केही आरोहीहरु घाइते भएको र उनीहरुको उद्धारका लागि मौसम प्रतिकूलताकै कारणले हेलिकोप्टरसमेत पठाउन सकिएको छैन ।