आज त्रिभुवन विमानस्थलबाट १४ वटा अन्तर्राष्ट्रिय उडान हुँदै
काठमाडौं । त्रिभुवन अन्तर्राष्ट्रिय विमानस्थलबाट आज (शुक्रबार) १४ वटा अन्तर्राष्ट्रिय उडान तथा अवतरण हुँदैछ ।
१४ वटा उडानमध्ये केही यात्रुवाहक, कार्गो र दुईवटा एयर एम्बुलेन्सको उडान तथा अवतरणको तालिका रहेको विमानस्थल कार्यालयले जनाएको छ ।
हिमालय एयरलाइन्सको २ वटा जहाज चीनको कुम्निङबाट बिहानै आइपुगेको छ भने राति दुई वटै प्लेन फेरि कुम्निङ जाँदैछन् । यस्तै, चीनको सिचुआन एयरको कार्गो जहाज छेन्दुबाट मेडिकल सामग्री ल्याएर आउने र फर्कने तालिका रहेको छ ।
बिहीबार मेडिकल सामग्री ल्याएर स्पेनबाट आएको आइबेरिया एयरको जहाज आफ्नो नागरिक लिएर स्पेनको राजधानी मड्रिड फर्कनेछ ।
यस्तै, एयर बबल अन्तरगत एयर इन्डियाको जहाज काठमाडौं आएर यात्रु लिई फर्कनेछ । भियतनामबाट दिउँसो २ बजे एयर एम्बुलेन्स आउँदैछ भने इन्डोनेसियाबाट पनि अर्को एयर एम्बुलेन्स आइपुग्ने तालिका रहेको छ ।
यस्तै, बुद्ध एयरले किनेको नयाँ जहाज पनि आजै भारको नयाँ दिल्लीबाट काठमाडौं आइपुग्ने त्रिभुवन विमानस्थल कार्यालयले जनाएको छ ।