तोडिएला त गोलको खडेरी ?
काठमाडौं । नेपालले त्रिदेशीय कप फुटबलको फाइनलमा बंगलादेशसँग खेल्दैछ । घरेलु मैदानमा आयोजना भएको प्रतियोगिताको दुवै खेलमा नेपालले गलरहित बराबरी खेल्दै फाइनलमा प्रवेश गरेको हो ।
नेपाली टोलीको अग्रपंक्तीमा अञ्जान विष्ट र अभिषेक रिजाललाई दुई वटै खेलको सुरुवाती एघारमा उतारेका थिए ।
नेपाली राष्ट्रिय टोलीको कप्तानी गोलकिपर किरण कुमार लिम्बूले गरेका छन् । उनी टोलीका सबैभन्दा अनुभवी खेलाडीसमेत हुन् ।
नेपालले विगत् ७ खेलमा नेपाली फर्वाडहरुले गोल गर्न सकिरहेका छैनन् । टोलीको फर्वाडमा अनुभवी खेलाडीको कमीले गर्दापनि गोल हुन सकिरहेको छैन ।
नेपाली टोलीका प्रशिक्षक बाल गोपाल महर्जनले फाइनलमा टोलीको मुख्य लक्ष्य गोल गर्दै उपाधि रक्षा गर्नु रहेका बताएका छन् ।
आजको फाइनल खेलमा टोलीको हौसला प्रदान गर्न प्रधानमन्त्री केपी शर्मा ओली पनि रंगशाला जाने भएका छन् । प्रधानमन्त्री ओलीले खेल अवधिभर रंगशालामा रही टोलीको मनोवल बढाउने भएका हुन् ।
यसैबीच आजको खेलबाट नेपाली टोलीमा सन् २०१५ देखि कप्तान रहेका विराज महर्जनले सन्यास लिने भएका छन् ।