नेपाल एपिएफ अस्पताल र मानव सेवा आश्रमबीच सहमति

177

काठमाडौं । नेपाल एपिएफ अस्पताल र मानव सेवा आश्रमबीच स्वास्थ्य उपचार सम्बन्धी सहमति भएको छ । सशस्त्र प्रहरी बल, नेपाल प्रधान कार्यालय हल्चोकमा आज आयोजित एक समारोहकाबीच सो सम्झौता भएको हो ।

नेपाल एपिएफ अस्पतालका संरक्षक सशस्त्र प्रहरी महानिरीक्षक शैलेन्द्र खनाल र मानव सेवा आश्रमका संरक्षक एवं समाजसेवी डा. गोविन्द टण्डनको उपस्थितिमा नेपाल एपिएफ अस्पतालको तर्फबाट प्राविधिक सशस्त्र प्रहरी वरिष्ठ उपरीक्षक डा. रुपक महर्जन र आश्रमका तर्फबाट आश्रमका अध्यक्ष रामजी अधिकारीले स्वास्थ्य उपचार सम्बन्धी पत्रमा हस्ताक्षर गरेका हुन् ।

यही माघ ९ गते २०औँ सशस्त्र प्रहरी दिवस २०७७ को अवसरमा आयोजित एक समारोहका बीच सशस्त्र प्रहरी महानिरीक्षक खनालले कल्याणकारी योजना मार्फत आश्रममा रहेका बेसहारा, अशक्त, असहाय एवं अभिभावकविहिनलाई नेपाल एपिएफ अस्पतालमा निःशुल्क उपचार गर्ने घोषणा गरेका थिए ।

सो कार्यक्रममा सशस्त्र प्रहरी महानिरीक्षक शैलेन्द्र खनालले ‘मानव सेवा नै सबैभन्दा ठूलो धर्म हो’ भन्दै सशस्त्र प्रहरी बल, नेपालले सुरक्षा र सेवाका कार्यहरु सँगसँगै गर्दै जाने र यस किसिमको कार्यले ती असहाय मानिसहरुको आर्शिवाद संगठनलाई प्राप्त हुने विश्वास व्यक्त गरे ।

उनले यस प्रकारको पवित्र कार्यले राष्ट्रसेवक सशस्त्र प्रहरी कर्मचारीहरुलाई सेवामा लाग्नका लागि उर्जा प्राप्त हुने र सो आश्रममा आश्रितहरुलाई दिइने स्वास्थ्य सेवाले अस्पतालको सेवा विस्तार हुँदै जाने बताए ।

कार्यक्रममा मानव सेवा आश्रमका संरक्षक डा. गोविन्द टण्डनले सो आश्रममा आश्रितहरुको उपचारका लागि विगतमा धैरै अस्पताल भौतारिनु पर्ने बाध्यता रहेको र सोचे जस्तो उपचार समेत पाउन नसकेको अप्ठ्यारा दिनहरुको स्मरण गर्दै यस पवित्र कार्यका लागि सशस्त्र प्रहरी बल, नेपालप्रति खुशी र कृतज्ञता व्यक्त गरे ।

यस सम्झौतासँगै सो आश्रमका आश्रितहरुले नेपाल एपिएफ अस्पतालमा उपलब्ध इमरजेन्सी, बहिरङ्ग, जनरल, तथा विशेषज्ञ ओपिडी, अन्तरङ्ग सेवा अन्तर्गतका वार्ड सबै, आइसियू, एचसियू एचडियू, माइनर तथा मेजर अप्रेशन सेवा, प्याथोलोजी सेवा निःशुल्क उपलब्ध हुनेछ ।

यसैगरी रेडियोलोजी अन्तर्गत एक्सरे, सिटी स्क्यान, अल्ट्रासाउण्ड, इकोकार्डियोग्राफी तथा फिजियोथेरापी सेवाका साथै आइसियू र डाइलासिसको लागि प्रयोग हुने अस्पतालमा उपलब्ध औषधीहरु, मुटुरोग, मृगौला रोग मधुमेह आदि भइ आजिवन औषधी सेवन गर्नुपर्ने बिरामीहरुको लागि आस्पतालमा उपलब्ध औषधीसमेत निःशुल्क उपलब्ध गराइने छ ।

यसैगरी अस्पतालमा अक्सिजन प्लान्ट रिफिल सिस्टम जडान भइ चालु हालतमा रहेको अवस्थामा आश्रमका बिरामीहरुलाई प्रयोग हुन सक्ने अक्सिजन सिलिण्डर उपलब्ध भएमा निःशुल्क रिफिलिङ्ग र आश्रमको सिफारिसमा काठमाडौं उपत्यकाभित्र निःशुल्क एम्बुलेन्स सेवा तथा शब वाहन सेवा, अस्पतालबाट खरिद गरिएका औषधीहरु आश्रमका बिरामीहरुलाई निःशुल्क प्रदान गरिने समेत सम्झौतामा उल्लेख छ ।

सो सम्झौतामा नेपाल एपिएफ अस्पतालमा हाल कायम भएको ११० शय्याको बेडमध्ये मानवसेवा आश्रमका बेसहारा, असक्त, असहाय एवं अभिभावकविहिनलाई तीन शय्याको बेड उपलब्ध गराइने उल्लेख गरिएको छ ।

कार्यक्रममा सशस्त्र प्रहरी अतिरिक्त महानिरीक्षक रामशरण पौडेल लगाएत सशस्त्र प्रहरी बल, नेपालका बरिष्ठ अधिकृतहरु तथा सो आश्रमका पदाधिकारीहरुको उपस्थिति रहेको थियो ।

Share This:
सम्बन्धित खबर
Loading...