ब्राजिलमा कोरोना संक्रमणबाट मृत्यु हुनेको संख्या १ लाख ८० हजार नाघ्यो
एजेन्सी । दक्षिण अमेरिकी देश ब्राजिलमा कोरोनाको महामारीबाट मृत्यु हुनेको संख्या बढेको छ । यहाँका स्वास्थ्य अधिकारीहरुले कोरोना भाइरसको संक्रमण रोकिने संकेत अझै देखिएको छैन । पछिल्लो अपडेटअनुसार ब्राजिलमा अहिलेसम्म कोरोनाबाट एक लाख ८० हजारभन्दा बढीको ज्यान गएको छ ।
प्राप्त समाचारअनुसार शनिबारसम्ममा यहाँका १ लाख ८० हजार ४ सय ११ जनाको ज्यान गएको हो । पछिल्लो २४ घन्टामा ४ सय ६४ जनाको मृत्यु भएको स्वास्थ्य मन्त्रालयले जानकारी दिएको छ ।
त्यस्तै पछिल्लो २४ घन्टामा ब्राजिलमा ५३ हजार ३ सय ६० जना संक्रमित भएका छन् । योसँगै ब्राजिलमा अहिलेसम्म ६८ लाख ३४ हजार ९ सय ६५ जना संक्रमित भएका छन् ।
ब्राजिलका स्वास्थ्य अधिकारीहरुले पछिल्लो समयमा यहाँ पनि कोरोना भाइरसको दोस्रो लहर आएको बताएका छन् । उनीहरुका अनुसार यहाँ सरकारले कडा खालको लकडाउन गरेको भए पनि संक्रमण भने घटेको छैन ।