अर्जेन्टिनामा कोभिड–१९ संक्रमितको सङ्ख्या दश लाख नाघ्यो
एजेन्सी । अर्जेन्टिनामा सोमबारसम्ममा कोभिड–१९ संक्रमितको सङ्ख्या १० लाखभन्दा बढी पुगेको छ । राजधानी ब्युनर्स आयर्समा सबैभन्दा बढी संक्रमित रहेको यहाँको स्वास्थ्य मन्त्रालयले मंगलबार जानकारी गराएको छ ।
विवरण अनुसार पछिल्लो २४ घण्टामा अर्जेन्टिनामा १२ हजार ९ सय ८२ जनामा कोरोना संक्रमण पुष्टि भएको हो ।
अर्जेन्टिनामा संक्रमितमध्ये अहिलेसम्म कूल २६ हजार ७ सय व्यक्तिको मृत्यु भएको सरकारी तथ्याङ्क रहेको छ ।
स्वास्थ्य मन्त्रालयबाट उपलब्ध गराइएको तथ्याङ्क अनुसार अर्जेन्टिनामा कूल आठ लाख संक्रमणमुक्त भई घर फर्किएका छन् ।
विश्वमा अमेरिका, भारत, ब्राजिल र रूसपछि धेरै कोभिड–१९ संक्रमित रहेको मुलुक अर्जेन्टिना हो ।
विश्वमा कोरोना भाइरसका कारण मंगलबारसम्म चार करोड ७१ लाखभन्दा बढी व्यक्ति संक्रमित बनेका पुष्टि भएको छ । विश्वभर कोभिड–१९ संक्रमित ११ लाख २३ हजार ८ सय ६८ व्यक्तिको मृत्यु भएको छ ।