समावेशी समाजवादी पार्टीकी प्रवक्ताको दाबी : ‘हामी नेपालमा इतिहास रच्ने छौँ’
काठमाडौँ, १५ मङ्सिर । नेपालको निर्वाचन इतिहासमा पहिलो पटक लैङ्गिक तथा यौनिक अल्पसङ्ख्यक समुदायको छुट्टै दल ‘समावेशी समाजवादी पार्टी’ दर्ता भएको छ । महिला, दृष्टिविहीन, अपाङ्गता भएका, फरक क्षमता भएका व्यक्तिहरूको सहभागितामा लैङ्गिक तथा यौनिक अल्पसङ्ख्यक समुदाय छुट्टै दल दर्ता भएको हो ।
कात्तिक २४ गते काठमाडौँमा राष्ट्रिय भेला गरेर तेस्रोलिङ्गी अधिकारकर्मी ‘मायाको पहिचान नेपाल’मा आबद्ध नुमा लिम्बू (चञ्चला)को अध्यक्षतामा गठन भएको २१ सदस्यीय समावेशी समाजवादी पार्टीले २७ कार्तिकमा दल दर्ताको निवेदन दिएको थियो । पार्टीले दर्ता प्रमाणपत्र समेत प्राप्त गरिसकेको छ ।
यसै क्रममा पार्टीकी प्रवक्ता समेत रहनुभएकी समलिङ्गी दृष्टिविहीन महिला प्रतीक्षा चापागाईंले फरक क्षमता भएका व्यक्तिहरुलाई पनि राजननीति समावेशिता सुनिश्चित गर्नुपर्छ भनेर अभियानका रुपमा दल दर्ता भएको बताउनुभयो ।
“नेपालको संविधानको धारा १२, १८, २२, ४२ अनुसार यौनिक तथा लैङ्गिक अल्पसंख्यक एवम् अन्य विभिन्न इन्टरसेक्सनल आइडेन्टिटिज बोकेका व्यक्तिहरूको पनि देशको नागरिकका रुपमा हुनुहुन्छ । उहाँहरूलाई पनि अघि बढाउनुपर्छ, राजनीतिक समावेशिता सुनिश्चित गर्नुपर्छ भनेर हामी आएका हौं । अन्य दलहरुले प्राथमिकता नदिएपछि हामी अघि बढ्न बाध्य भएका हौँ,” उहाँले भन्नुभयो ।
समावेशी समाजवादी पार्टी यौनिक तथा लैङ्गिक अल्पसंख्यकको मात्र नभइ दलमा अपाङ्गता भएका, जातीयता, भूगोल र विभिन्न परिस्थितिबाट अल्पसंख्यकमा परेका व्यक्तिहरुको प्रतिनिधित्वका लागि दल खोलेको उनको भनाइ छ । क्षमता र योग्यता नभएको भन्दै पछाडि पारिएका वर्ग एवम सिमान्तकृतहरुका लागि पार्टीले एक अभिभावकका रुपमा काम गर्ने पनि उहाँले बताउनुभयो ।
“हामीलाई भोटको लागि मात्र प्रयोग गरियो । लिडरसिप पोजिसनमा मौका नै दिइएन । त्यसैले हामी संगठित भएका हौँ,’ प्रवक्ता चापागाईले भन्नुभयो, “अब हामी यौनिक तथा लैङ्गिक अल्पसंख्यक व्यक्तित्वहरू मन, मस्तिष्क, हृदय, आत्मादेखि नै समावेशी बनेर अघि बढ्न चाहन्छौँ ।”
समाजवादी सिद्धान्तका आधारमा अघि बढ्ने बताउँदै उहाँले समानताका लागि अपाङ्गता भएका जातीय र लिङ्गीय रुपमा पछाडि परेका, भौगोलिक हिसाबले विभेदमा परेका साथै वैवाहिक समानताको मुद्दाले सशक्त रुपमा पार्टीलाई सक्रिय बनाउने बताउनुभयो ।
पार्टीका एजेन्डाहरु चाँडै सार्वजनिक गर्ने भन्दै प्रवक्ता चापागाईंले भन्नुभयो, “एजेन्डाहरुलाई अन्तिम रुम दिँदै छौँ । अन्य दलहरुका भन्दा पृथक र राम्रो एजेन्डाहरु लिएर जनतामाझ जाने छौँ। संघीय र प्रदेश संसददेखि स्थानीय तहहरुमा हाम्रो प्रतिनिधित्व सुनिश्चित गरेर देश र जनताको सेवा गर्न तत्पर छौँ ।”
नेपालको इतिहासमै सबैभन्दा पहिलो काम भएको उल्लेख गर्दै उहाँले आगामी निर्वाचनका लागि पनि चाँडै उम्मेदवारको विषयमा छलफल चलाउने पनि जनाउनुभयो ।